Jam 4 | WSK | STEP | Anape ko kager se ining singi nenenga ningi aratoso? Mu ko duap iwita: Ikia memek duap duap nengemang te aniso mu sokel ago anirukko karogo kaeso, se mu ko nina ining singi kager bita lagasan.

James 4

Ali imi ko munan biring tui ale Kaem ilak kapeterko

1 Anape ko kager se ining singi nenenga ningi aratoso? Mu ko duap iwita: Ikia memek duap duap nengemang te aniso mu sokel ago anirukko karogo kaeso, se mu ko nina ining singi kager bita lagasan. 2 Mu melmasak nina ko kuesan mu nina me gisan mu ko, nina kari sang nunga mosan se kuesan. Ale aking mel kariimet saki gisan mu nina gialko ikia tawun biya ninga moso, bare nina gialko me terong, se mu ko nina kager se ining singi betesan. Bare nina mel ko kuesan mu me gisan mu ko duap iwita, nina mel ko kuesan mu ko Kaem me aru ngatangorsan. 3 Agi nina mel bo talko ko ngatangasan, bare ninga ikia diram la te me ngatangasan, nina mel nengeta te amilmilaralko wore ko la ngatangasan, se mu ko nu nina nigiring me iluso.

4 Nina mu imet bo ko kuari beteso ale ko kuari ko kager kari arungak geragoso wore turan! Ikialko. Nina ali imi ko munan ko kuesan mu nina Kaem ilak kagersan. Bare nina mel mu me ko ikisan e? Awiriya nu ali imi ko munan ko kueso, mu nu kota numi Kaem ko kager kari ko numi beteso. 5 Kaem ko batoga te iwita aniso, nu Korang Bur ana nangaram se nangamang ningi bagoso mu ana noko kariimet nunguningkiri ko baganakko nago ko sail tagiwoso. Se awuk? Nu den mu am ipi ko balam se aniso e? 6 Bare Kaem ninguru gomang nangarso ale nanga sangarso. Buta se, Kaem ko batoga te iwita balam se aniso:

“Kaem kariimet nusupuling lagara mu nu
nunga kututuwu arungu kaposo.
Bare kariimet nunumi ira kutuwusan mu nu
gomang nungarso ale nunga sangarso.” ^{▼▼James 4:4-6 Ali imi ko munan ko me kuenakko: 1 John 2:15; Exo 20:3,5. Nainimi ira kutuwura ko den: Pro 3:34; 1 Peter 5:5-6.}
7 Buta se, nina Kaem ko kuring bowa ningi bagaralko. Bare Satan mu koma kaolal ale biriruwural se taguruk nagurokko. 8 Nina Kaem kote pingi namaral se nu nengete pingi tairukko. Nina kariimet memek alo, nigiting anuwalko! Nina kawel kuruwim alo, nengemang tuagu nungalko! 9 Ninga memek ko nengemang bataguk se mal niaralko! Gusira beteral ale mal niaralko! Ninga amilmil nama menaruk se nengemang batagukko! 10 Ale Kari Biya moke te ninimi ira kutuwural se nu ninga gi patawurukko!

Ka bo ko bagara me tuterko

11 Aga singsang alo, nina ninimi me balu maguwuralko. Awiriya nu ko launuria balu maguwuso, agi ko bagara tuteso, mu nu munan den Kari Biya nangaram mu den kawel ko balso ale biriruwuso. Ni balu munan den mu diram mena ko balu, mu ni den owore kuali kapasam ale ni tutera kari ko nimi betesam. ^{▼▼James 4:11-12 QQQ changed Nanga bo ko bagara me tutenakko: Mat 22:34-40; Rom 2:1; 14:4; 1 Peter 2:1.} 12 Bare Kaem nu kota la Munan Den Nangara ko Kari, se nu kota la Tutera Kari. Nu la kariimet nunga sangaru taukko terong mam, ale aking kota tala kariimet nunga maguwurokko terong mam. Se ni awuk nunguningkiri se ka bo ko bagara tutesam?

Keta nimi nip me patawurko

13 Nina saki iwita balsan: “Aitakta agi, ukurukse agi, ana wonong biya mu te namanak ale yar suwanta ko ura betenak ale manga suen nuam ta tanakko,” masan. 14 Bare ikialko. Nina anapeya ukurukse aratukko mu nina me ko ikisan. Se aking nina tom awilaya marak bagaralko mu nina me ko ikisan tala. ^{▼▼James 4:13-14 Me nainimi patowanakko: Luke 12:18-20; Pro 27:1.} Nina mu tama ko bur aratoso, ale tom katirta baga mena namoso wore turan. 15 Buta se, nina iwita balalko, “Kaem ko gomang ana uwutata betenakko agi mu asele, ana am baga se, mel imi agi umu betenakko,” uwutata balalko. 16 Bare nina nigiring kapa kapa, nengeta ninip patawu patawu geragasan. Nisipiling lagara uwuta mu memek.

17 Buta se ninguru ikialko. Kari nu munan yawara karo tuokko ko ikiso, bare nu me te beteso, mu kari umutang memek beteso.